Dy deputetët e Kuvendit të Republikës së Kosovës, Ilir Deda dhe Mimoza Kusari-Lila, janë takuar sot me kryetarin e komunës së Bujanovcit, Shaip Kamberin, me të cilin kanë diskutuar rreth përfshirjes së Luginës së Preshevës në dialogun ndërmjet Kosovës dhe Serbisë në Bruksel.

“U zotuam që do ta shtyjmë përpara parimin e reciprocitetit dhe që në kuadër të këtij parimi çështja e komunave Bujanovc, Medvegjë dhe Preshevë të jetë pjesë integrale e bisedimeve ndërmjet Kosovës dhe Serbisë, dhe u dakorduam që të intensifikojmë komunikimin mes nesh”, ka shkruar Deda në profilin e tij në facebook.

Sipas tyre Lugina e Preshevës duhet të trajtohet si një tërësi dhe jo në mënyrë të ndarë. Kjo çështje është përmendur më parë edhe nga krerët e Luginës së Preshevës të cilët kanë thënë se në rast të bashkimit me Kosovën, të gjitha komunat me shumicë shqiptare duhet të bashkohen si tërësi.

“Sot, si delegacion i Alternativës, me Mimoza Kusari dhe Alfred Halili qëndruam në Bujanovc. Në takim shumë miqësor me z. Shaip Kamberi, Kryetar i Bujanovcit, znj. Ardita Sinani, nënkryetare e Partisë së Veprimit Demokratik, dhe z. Fatmir Hasani deputet në Kuvendin e Serbisë – përkrahëm qëndrimin që Lugina e Preshevës të trajtohet si tërësi, dhe jo në mënyrë parciale”, vazhdon reagimi i Dedës.

Në takim është biseduar edhe rreth situatës aktuale politike në vend.

Kujtojmë se krerët e Luginës së Preshevës para pak dite qëndruan në Kosovë, ku kanë propozuar një rezolutë përmes të cilës Kuvendi i Republikës së Kosovës përkrahë bashkimin e Luginës së Preshevës me Republikën e Kosovës.